ယွၼ်ႉၶိူဝ်းၶၢႆႇဢိၼ်ႇတၼဵတ်ႇလႄႈ ၼၢင်းယိင်းၵေႃႉၼိုင်ႈ ထုၵ်ႇၵၼ်ႉၸၼ်

ယွၼ်ႉၶိူဝ်းၶၢႆႇ ဢိၼ်ႇတၼဵတ်ႇ IT ၵၢပ်ႈမိူင်းမိူဝ်ႈလဵဝ်လႄႈ ထိုင်တီႈ မႄႈႁိူၼ်းၼုမ်ႇၵေႃႉၼိုင်ႈ ဢၼ်ယူႇၼႂ်းမိူင်းမၢဝ်း ၼႂ်းၸိုင်ႈမိူင်းၶႄႇ ပေႃးလႆႈထုၵ်ႇ ၵူၼ်းၸၢႆးသွင်ၵေႃႉ ယွၵ်ႇလႅၼ် ဢွၼ်ၵႂႃႇၵၼ်ႉၸၼ်။

ပူၼ်ႉမႃးမိူဝ်ႈဝၼ်းထီႉ 3 လိူၼ် September.2014 ၶၢဝ်းယၢမ်းၵၢင်ၶိုၼ်း 12:00မူင်း တီႈၸႄႈဝဵင်းၸေႊၵဝ်ႇ မိူင်းမၢဝ်း ၼႂ်းၸိုင်ႈမိူင်းၶႄႇ၊ ဝဵင်းဢၼ်တိတ်းၸပ်း မိူင်းတႆးပွတ်းႁွင်ႇၼၼ်ႉ ယွၼ်ႉလူၺ်ႈ လဵၼ်ႈWechat ၶိူဝ်းၶၢႆႇၼႆႉသေ ၵႂႃႇမိုတ်ႈၺႃးၵၼ် တင်းၵူၼ်း ဢၼ်ဢမ်ႇႁွၼ်ႇႁူႉၸၵ်း ဢမ်ႇယၢမ်ႈႁၼ်ၼႃႈၼၼ်ႉ ႁွင်ႉထူပ်းၵၼ်လႄႈ ထိုင်တီႈ မႄႈႁိူၼ်းၼုမ်ႇၵေႃႉၼိုင်ႈ ပေႃးထုၵ်ႇၺႃးၵၼ်ႉၸၼ် ၼႆယဝ်ႉ။

ၵဵဝ်ႇၵပ်းလွင်ႈၼႆႉသေ မႄႈႁိူၼ်းၼုမ်ႇ ၵေႃႉဢၼ်ယူႇ ၼႂ်းၸိုင်ႈမိူင်းၶႄႇ ၸႄႈဝဵင်းပဝ်းသၢၼ်ႊ ၵေႃႉၼိုင်ႈၼၼ်ႉ လဵၼ်ႈ Wechat ၵွင်ႉၸူးၵၼ်တင်း မၢဝ်ႇဢွၼ်ႇသီႇပေႃႉ မိူင်းတႆးပွတ်းႁွင်ႇ လႄႈ ထိုင်တီႈမၢဝ်ႇဢွၼ်ႇၼၼ်ႉ တင်းဢူၺ်းၵေႃႉမၼ်း ၵေႃႉၼိုင်ႈ ပေႃႈလႆႈၶိုၼ်းၵႂႃႇၸူး ႁူပ်ႉထူပ်းၵၼ် တင်းမႄႈႁိူၼ်းၼုမ်ႇၵေႃႉၼၼ်ႉ ၼႂ်းလၢၼ်ႉၶၢႆပီႇယႃႇ (BEER) တီႈၸႄႈဝဵင်း ၸေႊၵဝ်ႇသေ မၢဝ်ႇဢွၼ်ႇသွင်ၵေႃႉၼႆႉ မိူဝ်ႈၵႂႃႇထူပ်းၵၼ်တင်း မႄႈႁိူၼ်းၼုမ်ႇ ၵေႃႉဢၼ်မီးတီႈလၢၼ်ႉၼၼ်ႉ ၶဝ်သွင်ၵေႃႉ ႁဵတ်းလွင်ႈဢမ်ႇလီ တေႃႇၼိူဝ်မၼ်းၼၢင်း ဢဝ်ယႃႈလိုမ်းတူဝ် သႂ်ႇၼႂ်းၵွၵ်းၵႅဝ်ႈ မၼ်းၼၢင်းလႄႈ ထိုင်တီႈမၼ်းၼၢင်း ပေႃႈလႆႈမဝ်းမိင်း လိုမ်းတူဝ်ၵႂႃႇ ၼႆယဝ်ႉ။

ဝၢႆးသေ မၼ်းၼၢင်းမဝ်းမိင်း လိုမ်းတူဝ်ယူႇၼၼ်ႉ မၢဝ်ႇဢွၼ်ႇသွင်ၵေႃႉ ၸင်ႇဢွၼ် ဢဝ်တူဝ်မၼ်းၼၢင်းၵႂႃႇ တၢင်ႇၼိူဝ်လူတ်ႉၶိူင်ႈ ၶဝ်သွင်ၵေႃႉသေ ႁေႃႈဢွၵ်ႇၵႂႃႇ တီႈတႃႈႁိူဝ်း ဝၢၼ်ႈၼွင်ၶမ်းၼိူဝ် ဢၼ်မီးၼႂ်းမိူင်းၶႄႇၼၼ်ႉ မိူဝ်ႈထိုင်ပွတ်ႈတၢင်းၼၼ်ႉ ၶဝ်သွင်ၵေႃႉ ၸင်ႇဢွၼ်ၵၼ် ၵၼ်ႉၸၼ်လူလၢႆမၼ်းၼၢင်းသေ ၽိူဝ်ႇမၼ်းၼၢင်းႁူႉတူဝ် မႃးၶိုၼ်းၼၼ်ႉ မၼ်းၼၢင်းၸင်ႇပၢဝ်ႇသႅၼ်ႇႁွင်ႉ ႁိမ်းႁွမ်းသေ ၵူၼ်းဝၢၼ်ႈၵေႃႉ ဢမ်ႇႁတ်းၵႂႃႇၸွႆႈ ၵႂႃႇတူၺ်း၊ ဝၢႆးၼၼ်ႉ ၵူၼ်းဝၢၼ်ႈၸင်ႇၵႂႃႇႁွင်ႉ ပလိၵ်ႈၶႄႇ မႃးၺွပ်းၵႂႃႇၼႆယဝ်ႉ။

ပလိၵ်ႈၶႄႇလႄႈ ဢိၵ်ႇတင်းၵူၼ်းလူင်ဝၢၼ်ႈၼွင်ၶမ်း ဢၼ်ၵႂႃႇတိၺွပ်းၼၼ်ႉ ၸင်ႇၸွပ်ႇထၢမ်တီႈ ၸၢႆးဢွၼ်ႇသွင်ၵေႃႉလႄႈ ဢိင်ႈတင်း မႄႈႁိူၼ်းၼုမ်ႇၵေႃႉၼၼ်ႉသေ ၸင်ႇၶိုၼ်းဢဝ်သူင်ႇပၼ်တီႈ ႁူင်းပလိၵ်ႈၶႄႇ တီႈသူၺ်ႇလီႇ မိူင်းမၢဝ်းၵႂႃႇ ၼႆယဝ်ႉ။

တႆးလွတ်ႈလႅဝ်း