ၶႄႇပွႆႇပၼ်ၶိုၼ်း ၵူၼ်းမိူင်းမၢၼ်ႈ ၸိူဝ်းလၵ်ႉၶၢမ်ႈၶဝ်ႈမိူင်းၶႄႇ

မိူဝ်ႈဝၼ်းထိ 06.September.2014 ယၢမ်းၵၢင်ၶမ်ႈ 20:00မူင်းၼၼ်ႉ လူင်ပွင်ၸိုင်ႈမိူင်းၶႄႇ ပွႆႇပၼ်ၶိုၼ်း ၵူၼ်းမိူင်းႁူမ်ႈတုမ်ႈမျၢၼ်ႇမႃႇ တႆး၊ မၢၼ်ႈ၊ တဢၢင်း ၸိူဝ်းလၵ်ႉၶၢမ်ႈၶဝ်ႈမိူင်းၶႄႇ ဢမ်ႇၸွမ်းၶႂၢင်ႇတြႃး လႄႈ ၵူၼ်းၸိူဝ်း ဢမ်ႇမီးပပ်ႉၶၢမ်ႈမိူင်း (ပပ်ႉလႅင်) ႁူဝ်ၵူၼ်းမွၵ်ႈ (300)ၵေႃႉ။

တင်ႈတႄႇ 4-5ပီႊ မႃးတၢင်းၼႃႈၼႆႉ တီႈလႅၼ်လိၼ် မိူင်းတႆးပွတ်းႁွင်ႇလႄႈ ၸိုင်ႈမိူင်းၶႄႇ တိတ်းၵၼ်ၼၼ်ႉ သင်ဝႃႈၵူၼ်းမိူင်း သွင်မိူင်း တေၶဝ်ႈဢွၵ်ႇၸူးၵၼ်ၼႆ တေလႆႈယိပ်းပပ်ႉၶၢမ်ႈမိူင်း (ပပ်ႉလႅင်)သေ ၶဝ်ႈဢွၵ်ႇၸူးၵၼ် တီႈဝၢင်းၽၵ်းတူသွင်မိူင်း ဢၼ်လူင်ပွင်ၸိုင်ႈသွင်မိူင်း လႆႈၸႂ်ၵၼ်သေ ပိုတ်ႇၽုၺ်ႇဝႆႉၼၼ်ႉၼႆ။

သင်ၸိူဝ်ႉဝႃႈ ပေႃးလၵ်ႉၶဝ်ႈမိူင်း ဢမ်ႇၼၼ် ႁဵတ်းလွင်ႈဢမ်ႇတြႃး ၶၢမ်ႈၶဝ်ႈၵႂႃႇမႃး ၼႂ်းမိူင်းၶႄႇသေ ပေႃးၽူႈမီးပုၼ်ႈၽွၼ်း ၽၢႆႇၶႄႇၶဝ် ၵူတ်ႇထတ်းႁူႉႁၼ်မႃးၼႆ ၵေႃႉဢၼ်ပဵၼ်ၵူၼ်း လၵ်ႉၶၢမ်ႈမိူင်းၼၼ်ႉ  ဢမ်ႇလူဝ်ႇလၢတ်းၵႂၢမ်းၼမ်သင် ဢမ်ႇလူဝ်ႇဢဝ်ၶေႃႈဢိင်ဢၢင်ႈသင် ၽၢႆႇၶႄႇၶဝ် တိုၼ်းတေတိၺွပ်း ဢဝ်ၵႂႃႇ သႂ်ႇၶွၵ်ႈၶင် တႃႇ (6)လိူၼ် ၵမ်းလဵဝ်ယူႇယဝ်ႉ။

ၵူၼ်းၸိူဝ်းထုၵ်ႇတၺွပ်းတူဝ်ၵႂႃႇၼၼ်ႉ ၵမ်ႉၽွင်ႈၵေႃႈၵၢမ်ႇႁၢႆႉလႄႈ ထုၵ်ႇၶႄႇၶဝ် တိၺွပ်းသူင်ႇတူဝ်ၵႂႃႇ ႁဵတ်းတၢင်းလူတ်ႉၾႆး တၢင်းၵႃးၸိူဝ်းၼႆႉ ပုၼ်ႈတႃႇမိူင်းၶဝ် တေၶိုၼ်ႈယႂ်ႇၸႃႉၵႂႃႇၼႆ ၸၢႆးသူၺ်ႇလႃႉ ၵူၼ်းၵေႃႉလႆႈ လွတ်ႈဢွၵ်ႇၶွၵ်ႈမႃး မိူဝ်ႈၶမ်ႈဝႃးၼၼ်ႉ လၢတ်ႈတီႈတႆးလွတ်ႈလႅဝ်း ၼင်ႇၼႆ။

မၼ်းၸၢႆး သိုပ်ႇလၢတ်ႈထႅင်ႈဝႃႈ “ဢၼ်ၶဝ်ပွႆႇႁဝ်း ဝၼ်းမိူဝ်ႈၼႆႉၵေႃႉ ႁဝ်းၶႃႈဢမ်ႇလႆႈႁူႉတူဝ်လႃးလႃး မိူဝ်ႈၸဝ်ႉၼၼ်ႉ ၶဝ်ႁွင်ႉဢဝ်ႁဝ်းၶႃႈ ၶဝ်ႈထႅဝ်သေ လိုပ်ႈၶိုၼ်ႈၵႃႈၵူၺ်း ၸိူင်ႉၼၼ်ၵူၺ်း၊ ဢမ်ႇႁူႉဝႃႈ တေသိုပ်ႇသူင်ႇတူဝ်ၵႂႃႇလႂ်ထႅင်ႈ၊ ၵႃးဢၼ်ၶႃႈလႆႈၶီႇမႃးၼႆႉတေႉ မီးၵူၼ်းယူႇမွၵ်ႈ (30)ၵေႃႉ၊ ၵူၼ်းတူၵ်းၶွၵ်ႈၼႆႉ တေပႃးၸၢဝ်းၶိူဝ်းတႆးႁဝ်း ၵမ်ႉၼမ် လိူဝ်သေၼၼ်ႉ တေပႃးၸၢဝ်းၶိူဝ်း ပလွင်ႈ(တဢၢင်း) လႄႈ ၸၢဝ်းၶိူဝ်းမၢၼ်ႈ ဢိတ်းဢွတ်း၊ ယဝ်ႉၵေႃႈ တေပႃးၵူၼ်းၵူႈသႅၼ်း ၵူၼ်းၼုမ်ႇ၊ ၵူၼ်းႁၢတ်ႈလႄႈ ၼၢင်းယိင်း၊ ဢိၵ်ႇမႄႈလုၵ်ႈဢွၼ်ႇ ၸိူဝ်းၼႆႉ ၶူၼ်းလေႃးၵၼ်ဝႆႉမူတ်းၶႃႈယဝ်ႉ” ၼႆ။

ဢၼ်ၶဝ်ပွႆႇပၼ်ၶိုၼ်း ၵူၼ်းတူၵ်းၶွၵ်ႈၶမ်ႈဝႃးၼၼ်ႉ တေမီးႁူဝ်ၵူၼ်းမွၵ်ႈ (300)ၵေႃႉ ၼႂ်းၵႃႈႁူဝ်ၵူၼ်း (300)ၵေႃႉၼၼ်ႉ ပႃးၵူၼ်းတၢႆမႃးၵေႃႉၼိုင်ႈ ၊ ၽူႈမီးပုၼ်ႈၽွၼ်းၽၢႆႇၶႄႇၶဝ်တႄႉ လၢတ်ႈဝႃႈ မိူဝ်ႈမၼ်းယူႇ ၼႂ်းၶွၵ်ႈၼၼ်ႉ ယုင်းၶူပ်းမၼ်းလႄႈ မၼ်းလႆႈၸပ်းတၢင်းပဵၼ်သေတၢႆၵႂႃႇ ယွၼ်ႉၼၼ် လႆႈဢဝ်တူဝ်တၢႆမၼ်း မႃးသူင်ႇပၼ်ၶိုၼ်းၵူၺ်း ဝႃႈၼႆ။

ၵူၼ်းတူၵ်းၶွၵ်ႈၸိူဝ်းၼႆႉ လူင်ပွင်ၸိုင်ႈမိူင်းၶႄႇၶဝ် လႆႈဢဝ်တူဝ်တၢင်ႇၵႃးၵႂႃႇသူင်ႇတီႈ တႃႈႁိူဝ်းႁူဝ်ၽၢႆ ၼႂ်းဝၢၼ်ႈႁူဝ်ၽၢႆ ၼႂ်းလိၼ်ၶႄႇသေ ၵူၼ်းတူၵ်းၶွၵ်ႈၶဝ် သိုပ်ႇၶီႇႁူိဝ်းၵႂႃႇလူင်းတီႈ တႃႈႁိူဝ်းတေႃႇယွတ်ႈ ၸႄႈဝဵင်းမူႇၸေႊ မိူင်းတႆးပွတ်းႁွင်ႇ ဝႃႈၼႆ။

ၸိူဝ်းမီးပီႈ မီးၼွင်ႉ တီႈၼႂ်းဝဵင်းမူႇၸေႊၵေႃႈ ၵႂႃႇမိူဝ်းၼွၼ်း ႁိူၼ်းပီႈၼွင်ႉၽႂ်မၼ်း၊ ၸိူဝ်းဢမ်ႇမီးပီႈ မီးၼွင်ႉတီႈၼၼ်ႉၵေႃႈ လႆႈၵႂႃႇယွၼ်းပိုင်ဢိင် ၼွၼ်းၵျွင်းမုၼ်ၸဝ်ႈလႄႈ ႁိမ်းႁွမ်းဝၢၼ်ႈတေႃႇယွတ်ႈ ၸိူဝ်းၼႆႉ ၼႆယဝ်ႉ။

ၵူၼ်းဢၼ်ၶႄႇၶဝ် တိၺွပ်းဢဝ်ၵႂႃႇၶင်ၶွၵ်ႈသေ ပွႆႇပၼ်ၶိုၼ်းၶမ်ႈဝႃးၼၼ်ႉ ပႃးၵူၼ်းမိူင်း ၼႂ်းဝဵင်းၼမ်ႉၶမ်း၊ မူႇၸေႊ၊ မိူင်းဝုၺ်း၊ မိူင်းၸီး၊ မိူင်းယေႃ၊ မိူင်းယႃႉ၊ သီႇပေႃႉ၊ ၵျွၵ်းမႄး၊ လႃႈသဵဝ်ႈ၊ တၢင်ႉယၢၼ်း ၊ မိူင်းမိတ်ႈ ၊ၵူတ်ႉၶၢႆ ၊ မိူင်းယႆလႄႈ ၵူၼ်မိူင်းပွတ်းၸၢၼ်း ၼႂ်းဝဵင်းလၢႆးၶႃႈ ၊ မိူင်းၵိုင်၊ ၵေးသီး ဢိၵ်ႇၵူၼ်းမိူင်းမၢၼ်ႈ ၵမ်ႉၽွင်ႈၼႆ ပႃႈမျႃႉၵေႃႉဢၼ် လႆႈၵႂႃႇတူၵ်းၶွၵ်ႈ တီႈၶူၺ်ႊမျိၼ်ႈ ၸိုင်ႈမိူင်းၶႄႇသေ လွတ်ႈမႃးၶိုၼ်းၼၼ်ႉ လၢတ်ႈၼင်ႇၼႆ။

ပႃႈမျႃႉ တင်းႁႆႈတင်းပွင်ႉၶင်းသေ သိုပ်ႇလၢတ်ႈဝႃႈ ယူႇမိူင်းႁဝ်းၵေႃႈ ၵူၺ်းၵုမ်ႇလႆႈပၢႆသိုၵ်းပၢႆသိူဝ်ယူႇ ပၢႆၵႂႃႇႁဵတ်းၵၢၼ် မိူင်းပိူၼ်ႈၵေႃႈ လႆႈၶၢမ်ႇတၢင်းပိူၼ်ႈတိၺွပ်း၊ လႆႈၽၢတ်ႇပီႈ ၽၢတ်ႇၼွင်ႉသေဢမ်ႇၵႃး ႁဝ်းပေႃႈမႄႈလုၵ်ႈၵေႃႈ ၼိုင်ႈၵေႃႉ လႆႈၵႂႃႇတူၵ်းၶွၵ်ႈယူႇၼိုင်ႈတီႈ၊ ၶဝ်ဢမ်ႇပွႆႇႁဝ်း ယူႇတီႈလဵဝ်၊ မိူဝ်ႈၼႆႉ ဢၼ်ၶဝ်ပွႆႇမႃးၼႆႉ လုၵ်ႈႁဝ်းယင်းဢမ်ႇပႃးၸွမ်းမႃး၊ တေၵႂႃႇမီးလႂ် ၽႅဝ်လႂ် ႁွတ်ႈလႂ် ယဝ်ႉၵေႃႈဢမ်ႇႁူႉ ၼႆယဝ်ႉ။

ၵဵဝ်ႇၵပ်း လူင်ပွင်ၸိုင်ႈၶႄႇ ပွႆႇပၼ်ၶိုၼ်းၵူၼ်းမိူင်း ႁူမ်ႈတုမ်ႈမိူင်းမၢၼ်ႈ ၶမ်ႈဝႃးၼၼ်ႉ ၽၢႆႇလူင်ပွင်ၸိုင်ႈမိူင်းမၢၼ်ႈ ဢမ်ႇပႆႇလၢတ်ႈၸွမ်းသင်သေ ပႆႇလူင်းႁပ်ႉႁွင်း လုမ်းလႃးလူလွမ် တူၺ်းထိုင်ပၼ်သင်ၶဝ် ဝႃႈၼႆ။

ၼႂ်းပၵ်းပိူင် လူင်ပွင်ၸိုင်ႈမိူင်းၶႄႇ မီးဝႆႉဝႃႈ ပေႃးၵူၼ်း ဢမ်ႇမီးပပ်ႉၶၢမ်ႈမိူင်း (ပပ်ႉလႅင်)သေ ၶဝ်ႈၵႂႃႇလႄႇၵေႃႈလီ ၵႂႃႇယူႇၵေႃႈလီ သင်ၽူႈမီးပုၼ်ႈၽွၼ်းၽၢႆႇၶဝ် တိၺွပ်းလႆႈၸိုင် တိုၼ်းတေမီးတၢမ်ႇၶွၵ်ႈ (6)လိူၼ် ၼႆယဝ်ႉ။

တႆးလွတ်ႈလႅဝ်း