ၵူၼ်းမိူင်းၼမ်ႉၶမ်း တေသိုပ်ႇလုၵ်ႉၼႄၵၢင်ၸႂ်သၢၼ်ၶတ်း ၶူင်းၵၢၼ်ၶုတ်းႁႄႈထႅင်ႈ

ၵၢၼ်လုၵ်ႉႁိုၼ်ႇ ၼႄၵၢင်ၸႂ် ၸဝ်ႈႁႆႈၸဝ်ႈၼႃးလႄႈ ၵူၼ်းမိူင်း ဝဵင်းၼမ်ႉၶမ်း ဢၼ်သၢၼ်ၶတ်းတေႃႇ ၶူင်းၵၢၼ်ၶုတ်းႁိၼ်ႁႄႈ ငူၺ်ႇၵပႃႇၵျေႃႇၼၼ်ႉ ဢမ်ႇပႆႇယဝ်ႉတူဝ်ႈ ယွၼ်ႉၽူႈၵွၼ်းၸႄႈဝဵင်း ဢူးသေႃးမိၼ်း လၵ်ႉပၢႆႈပုၼ်ႈၽွၼ်း။

မိူဝ်ႈၼႆႉဝၼ်းထိ 05.September.2014 ဢၼ်ပႃႇတီႇႁူဝ်သိူဝ်၊ သိူဝ်ၽိူၵ်ႇ ဢွၼ်ႁူဝ်ၵေႃႁူမ်ႈသၢင်ႈ ၸဝ်ႈႁႆႈၸဝ်ႈၼႃး ၼမ်ႉၶမ်း (11)ၸႄႈဝဵင်း လႄႈ ပေႃႈမႄႈၵူၼ်းမိူင်းၼမ်ႉၶမ်း ႁႅင်းၵူၼ်း 3,000ၵေႃႉပၢႆသေ ၵႂႃႇပႆတၢင်းလုၵ်ႉႁိုၼ်ႇၼႄၵၢင်ၸႂ် သၢၼ်ၶတ်းတေႃႇ ၶူင်းၵၢၼ်ၶုတ်းႁိၼ်ႁႄႈ ငူၺ်ႇၵပႃႇၵျေႃႇၼၼ်ႉ ဢမ်ႇပႆႇလႆႈၶေႃႈၸိသင်ႇ လိၵ်ႈႁူမ်ႈမၢႆ တႃႇၵိုတ်းယိုတ်းပႅတ်ႈ ၶူင်းၵၢၼ် တီႈၽူႈၵွၼ်းၸႄႈဝဵင်း  ယွၼ်ႉဢူးသေႃးမိၼ်း ၵေႃႉပဵၼ် ၽူႈၵွၼ်းၸႄႈဝဵင်းၼမ်ႉၶမ်း လၵ်ႉပၢႆႈပုၼ်ႈၽွၼ်းၵႂႃႇ တီႈဝဵင်းမူႇၸႄႈ ဝႃႈၼႆ။

ယွၼ်ႉသင်ၵေႃႈလီ ဢၼ်ဢူးသေႃးမိၼ်း ႁဵတ်းၵႂႃႇၼၼ်ႉ ၵူၼ်းမိူင်းၼမ်ႉၶမ်းတင်းသဵင်ႈ ဢမ်ႇႁၼ်လီလႆႈၸႂ်၊ ဢမ်ႇထုၵ်ႇလီ ပဵၼ်ၽူႈၵွၼ်းၸႄႈဝဵင်း၊ ပဵၼ်ၵူၼ်း ဢၼ်ဢမ်ႇလူလွမ် တူၺ်းထိုင်ပႂ်ႉပႃးၵူၼ်းမိူင်းသေ ၵူၼ်းမိူင်းတင်းသဵင်ႈ ဢွၼ်ၵၼ်ပဵၼ်တေႃးသ ပွင်ႉၶင်းႁႅင်း။

ယွၼ်ႉလူၺ်ႈ ဢူးသေႃးမိၼ်းၵေႃႉလဵဝ်သေ ႁဵတ်းႁႂ်ႈ ၸဝ်ႈႁႆႈၸဝ်ႈၼႃး (11)ၸႄႈဝဵင်း လႄႈ ပေႃႈမႄႈၵူၼ်းမိူင်းၼမ်ႉၶမ်းၶဝ်တင်းသဵင်ႈ ဢမ်ႇႁၢၼ်ႉၸႂ်၊ ၵၢၼ်လုၵ်ႉႁိုၼ်ႇ ၼႄၵၢင်ၸႂ်သၢၼ်ၶတ်းတေႃႇ ၶူင်းၵၢၼ်ၶုတ်းႁိၼ်ႁႄႈၵေႃႈ ပႆႇယဝ်ႉတူဝ်ႈ၊ သင်ၽူႈၵွၼ်းႄၸႈဝဵင်းၶဝ် ဢမ်ႇလူင်းထတ်းပၼ်ၶုိၼ်းၸုိင် မိူဝ်ႈၽုၵ်ႉႁိုဝ် ဢမ်ႇၼၼ် ဝၼ်းထိ 10.September.2014 ၼႆႉ တေၸၢင်ႈသိုပ်ႇလုၵ်ႉၼႄၵၢင်ၸႂ် သၢၼ်ၶတ်းၵႂႃႇထႅင်ႈၼႆ ၵူၼ်းဝဵင်းၼမ်ႉၶမ်းၵေႃႉၼိုင်ႈလၢတ်ႈ။

ၼႂ်းၵၢၼ်လုၵ်ႉႁိုၼ်ႇၼၼ်ႉ မီးၵူၼ်းဝၢၼ်ႈ ၸႄႈႁႆး၊ ၵုင်းသႃႇ၊ ဝၢၼ်ႈၼွင်၊ ၵွင်းတပ်ႉ ၸႃႉၵႂႃႇ ဝၢၼ်ႈလႄႈပွၵ်ႉႁူမ်ႈ (64) ဢၼ်မီးၼႂ်းၸႄႈဝဵင်းၼမ်ႉၶမ်း လုၵ်ႉတီႈသၢႆၼမ်ႉသီးရီး ဢၼ်မီးၼႂ်းၵႄႈၵၢင် ဝၢၼ်ႈၸႄႈႁႆး တင်းဝၢၼ်ႈၶမ်းသေ တႄႇပႆတၢင်း ၼႄၵၢင်ၸႂ်သၢၼ်ၶတ်း တေႃႇထိုင် တီႈပၢင်ႇပွႆး၊ ၶၢဝ်းယၢမ်းၵၢင်ၼႂ် 9:00မူင်းတဵမ် တေႃႇထိုင်ၵၢင်ဝၼ်း 12:00မူင်း ဝႃႈၼႆ။

တႆးလွတ်ႈလႅဝ်း