ယွၼ်ႉသင် ၵူၼ်းမိူင်းၼမ်ႉၶမ်း တေလုၵ်ႉၼႄၵၢင်ၸႂ် သၢၼ်ၶတ်း ၶူင်းၵၢၼ်ၶုတ်းႁိၼ်ႁႄႈ

မိူဝ်ႈၽုၵ်ႉ ပႃႇတီႇတႆးသွင်ပႃႇတီႇ ႁူဝ်သိူဝ်၊ သိူဝ်ၽိူၵ်ႇ တေဢွၼ်ႁူဝ် ပေႃႈမႄႈပီႈၼွင်ႉ ၸဝ်ႈႁႆႈၸဝ်ႈၼႃး ဝဵင်းၼမ်ႉၶမ်း ပႆတၢင်းလုၵ်ႉႁိုၼ်ႇၼႄၵၢင်ၸႂ် သၢၼ်ၶတ်းတေႃႇ ၶူင်းၵၢၼ် ၶုတ်းႁိၼ်ႁႄႈ ငူၺ်ႇၵပႃႇၵျေႃႇ ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼႆႉ ယွၼ်ႉလွင်ႈသင်လၢႆလၢႆ။
ၸၢႆးသၢင်ႇယီႈ ၵေႃႉပဵၼ်ၸဝ်ႈၼႃး ဢၼ်လႆႈပိုင်ႈဢိင် တီႈၼမ်ႉႁွင်ႈလူင် ၼမ်ႉသီးရီး ႁဵတ်းၼႃးယူႇတီႈပိုၼ်ႉတီႈၼၼ်ႉ လၢတ်ႈတီႈတႆးလွတ်ႈလႅဝ်းဝႃႈ “ႁွင်ႈၼမ်ႉလူင် ၼမ်ႉသီးရီးၼႆႉ ပဵၼ်ႁူဝ်ၼမ်ႉၼႃး တီႈႁဝ်းၶႃႈ လႆႈပိုင်ႈဢိင်ၸႂ်ႇယႂ်ႇမၼ်းမႃး ၸဵမ်မိူဝ်ႈပၢၼ်ပူႇပၢၼ်မွၼ်ႇႁဝ်း၊ ၼင်ႇႁိုဝ်ႁဝ်းၶႃႈ ပေႃးတေလႆႈ ႁဵတ်းၵၢၼ်ၽုၵ်ႇသွမ်ႈၵႂႃႇ ငၢႆႈၸႂ်ၼၼ်ႉ ႁွင်ႈၼမ်ႉလူင် ၼမ်ႉသီးရီးၼႆႉ ပဵၼ်ဢၼ်ၸွႆႈထႅမ်ႁဝ်းၶႃႈ ၸဝ်ႈၼႃးတင်းသဵင်ႈ ပီႊသိုပ်ႇပီႊယူႇၶႃႈယဝ်ႉ”။

“ထိုင်မႃးပီႊၵၢႆလႄႈပီႊၼႆႉ ၼမ်ႉဢမ်ႇသႅၼ်ႈသႂ်သေလိူၼ် ၽွင်သၢႆးၵေႃႈလႆၸွမ်းၼမ်ႉမႃးသေ ထိူမ်လိၼ်ၽုၵ်ႇသွမ်ႈ၊ ႁိုင်မႃး တီႈၽုၵ်ႇသွမ်ႈၵေႃႈ ပဵၼ်လိၼ်ၵႅၼ်ႇသေ ဢမ်ႇၸၢင်ႈၽုၵ်ႇသွမ်ႈ ႁဵတ်းၵိၼ်သင်လႆႈ၊ မိူဝ်ႈၵူႈပီႊၼၼ်ႉ ႁွင်ႈသႂ်ႇၼမ်ႉၼႃးႁဝ်း ၼိုင်ႈပီႊ လႆႈလၢင်းၼိုင်ႈပွၵ်ႈၵူၺ်း၊ လႆႈလၢင်းပႅတ်ႈ ယိူဝ်ႈဢွၼ်ႇငႂ်ႈဢွၼ်ႇမၼ်းၵူၺ်း၊ ထိုင်မႃးပီႈၼႆႉသမ်ႉ ႁဝ်းၶႃႈတေသႂ်ႇၼမ်ႉၼႃး ၵမ်းလႂ်ၵေႃႈ လႆႈလၢင်းပႃးသၢႆးႁိၼ်ၵႅၼ်ႇမၼ်းပႅတ်ႈ ၵူႈၵမ်း၊ ယဝ်ႉၵေႃႈ လႆႈဢဝ်ၶူဝ်လႅမ် ၵူၼ်ႇ/ၶုတ်းၵွၼ်ႇ သၢႆးႁိၼ်ၸင်ႇယၢႆႈ၊ ႁဝ်းၶႃႈလႆႈသဵင်ႈႁႅင်းၵူၼ်း ယွၼ်ႉမၼ်းၼမ်တေႉတေႉၶႃႈ၊ ထႅင်ႈၽၢႆႇၼိုင်ႈ ဢၼ်ႁူၵ်းႁၢႆႉလိူဝ်သေပိူၼ်ႈၼႆႉ ထိူၼ်ႇပႃႇသၽႃႇဝ ၼမ်ႉလိၼ်ႁိၼ်ၽႃမိူင်းႁဝ်း လူႉလႅဝ်ၼမ်၊ ၵွႆပၢႆဝၢႆးမႃး လုၵ်ႈလၢၼ်ႁဝ်းၶႃႈ ၸိူဝ်းတေသိုပ်ႇယူႇသဝ်း ၵိၼ်ထင်ၵႂႃႇၼႂ်းဝၼ်းမိူဝ်းၼႃႈၼၼ်ႉ တေဢမ်ႇၸၢင်ႈၽုၵ်ႇသွမ်ႈ ႁဵတ်းၵိၼ်သင်လႆႈယဝ်ႉၶႃႈ၊ ယွၼ်ႉၼၼ်လႄႈ ၵၢၼ်ၶုတ်းႁိၼ်ႁႄႈၼႆႉ လီတႃႇၸဝ်ႈပၢႆးမၢၵ်ႈမီးၶဝ်ၵူၺ်း တွၼ်ႈတႃႇၵူၼ်းမိူင်းႁဝ်းၶႃႈလႄႈ ၸဝ်ႈသူၼ်ၸဝ်ႈၼႃးႁဝ်းၶႃႈ တင်းသဵင်ႈၼႆႉ ဢမ်ႇမီးၽွၼ်းလီဢီႈသင်” ၼႆယဝ်ႉ။

ၵဵဝ်ႇၵပ်းလွင်ႈၶုတ်ႉႁိၼ်ႁႄႈၼႆႉ ယူႇတီႈၸဝ်ႈႁႆႈၸဝ်ႈၼႃး ၼမ်ႉၶမ်းၶဝ် လႆႈၵႂႃႇတၢင်ႇ ယွၼ်းတၢင်းၸွႆႈထႅမ်ဝႆႉ တီႈလူင်ပွင်ၸိုင်ႈ လၢႆပွၵ်ႈလၢႆၵမ်းၼႃႇယဝ်ႉ ၵူၺ်းၵႃႈ ၽၢႆႇလူင်ပွင်ၸိုင်ႈၶဝ် ဢမ်ႇၸွႆႈထႅမ် ဢဝ်လိူင်ႈသင်ပၼ်ဝႃႈၼႆ။

မိူဝ်ႈပီႊၵၢႆပူၼ်ႉမႃးၼၼ်ႉ ယူႇတီႈႁူဝ်ပဝ်ႈပႃႇတီႇသိူဝ်ၽိူၵ်ႇ လုင်းၸၢႆးဢၢႆႈပဝ်း ၸင်ႇၵႂႃႇတႅပ်းတတ်းပၼ် ၼႂ်းၵႄႈၵၢင် ၶူင်းၵၢၼ်ၶုတ်ႉႁိၼ်ႁႄႈ ငူၺ်ႇၵပႃႇၵျေႃႇ လႄႈတင်း ၸဝ်ႈႁႆႈၸဝ်ႈၼႃးၶဝ်သေ ၸွႆႈထႅမ် ႁႂ်ႈၶူင်းၵၢၼ် သၢႆႈတႅၼ်းပၼ် တီႈၸဝ်ႈႁႆႈၸဝ်ႈၼႃး (1)ဢေႇၵလႂ် (5)သႅၼ်ပျႃး ဝႃႈၼႆ။

ၽိူဝ်ႇထိုင်ၼႂ်းပီႊၼႆႉမႃး ၽၢႆႇၸဝ်ႈၶွင်ၶူင်းၵၢၼ်ၶဝ် ၶိုၼ်းထဵင်ဝႃႈ လွင်ႈသၢႆးႁိၼ်ႁႄႈ လႆႈလႆၸွမ်းၼႂ်းႁွင်ႈၼမ်ႉသေ ထိူမ်ၺႃးသူၼ်ၼႃးၼၼ်ႉ မၼ်းဢမ်ႇၸႂ်ႈယွၼ်ႉၶူင်းၵၢၼ်ၶဝ် ပဵၼ်ယွၼ်ႉၽေးသၽႃႇဝသေလႄႈ ၼမ်ႉၼွင်းထူမ်ႈၵူၺ်းၼႆ ၽူႈၶဝ်ႈပႃႇတီႇသိူဝ်ၽိူၵ်ႇၼမ်ႉၶမ်း ၵေႃႉၼိုင်ႈလၢတ်ႈၼင်ႇၼႆ။

ယွၼ်ႉလွင်ႈၸိူဝ်းၼႆႉသေလႄႈ ပေႃးထိုင်မိူဝ်ႈၽုၵ်ႈ ဝၼ်းထိ 05.September.2014ၼႆႉ ယူႇတီႈပႃႇတီႇႁူဝ်သိူဝ် လႄႈ ပႃႇတီႇသိူဝ်ၽိူၵ်ႇၶဝ် သွင်ပႃႇတီႇ တေဢွၼ်ႁူဝ် ပီႈၼွင်ႉၸဝ်ႈသူၼ်ၸဝ်ႈၼႃး ၼမ်ႉၶမ်းၶဝ်သေ ပႆတၢင်း လုၵ်ႉႁိုၼ်ႇၼႄၵၢင်ၸႂ်တေႃႇ ၶူင်းၵၢၼ်ၶုတ်းႁိၼ်ႁႄႈ ငူၺ်ႇၵပႃႇၵျေႃႇ တီႈၼမ်ႉသီးရီး ၼႆယဝ်ႉ။

ယိူင်းဢၢၼ်း ၼႂ်းၶေႃႈၼႄၵၢင်ၸႂ် ၸဝ်ႈသူၼ်ၸဝ်ႈၼႃး ၼမ်ႉၶမ်းၼၼ်ႉ
1.    ၵၢၼ်ၶုတ်းႁိၼ်ႁႄႈ ဢၼ်မီးၼႂ်းၸႄႈဝဵင်းၼမ်ႉၶမ်း တင်းသဵင်ႈ တိုၼ်းႁႂ်ႈၵိုတ်းယိုတ်းၵမ်းသိုဝ်ႈ
2.    ၶေးၼမ်ႉသီးရီးလႄႈ ၽၢႆၸိူဝ်းလူႉလႅဝ်ၵႂႃႇၼၼ်ႉ ႁႂ်ႈမႄးၶူတ်ႉ မႄးႁဵတ်းပၼ် ၼင်ႇပိူင်ႈၵဝ်ႇ
3.    တိူၵ်ႇႁႆႈလွၵ်းၼႃး လႄႈ မၢၵ်ႇၶဝ်ႈတဝ်ႈၼမ်ႉ ၸိူဝ်းလႆႈလူႉသုမ်းၵႂႃႇတင်းသဵင်ႈၼၼ်ႉ ႁႂ်ႈသၢႆႈတႅၼ်းပၼ်ၶိုၼ်း တဵမ်ထူၼ်ႈ
4.    တိူၵ်ႇႁႆႈလွၵ်းၼႃး ၸိူဝ်းလူႉလႅဝ်ၵႂႃႇၼၼ်ႉ ႁႂ်ႈမႄးပၼ် တႃႇတေသိုပ်ႇၽုၵ်ႇသွမ်ႈလႆႈၶိုၼ်း ၼႆယဝ်ႉ။

ဢၼ်တေပႆတၢင်းလုၵ်ႉႁိုၼ်ႇၼႄၵၢင်ၸႂ်ၼၼ်ႉၵေႃႈ လႆႈယွၼ်းၶႂၢင်ႉ တီႈလူင်ပွင်ၸိုင်ႈၶဝ်ဝႆႉယဝ်ႉ လူင်ပွင်ၸိုင်ၶဝ်ၵေႃႈ ပၼ်ဢၶႂၢင်ႉသေ တေတႄႇလုၵ်ႉတီႈ ႁူဝ်ဝၢၼ်ႈ ဝၢၼ်ႈၶမ်း ပႆၸွမ်းၼိူဝ်သဵၼ်ႈတၢင်းလူင် တေႃႇႁွတ်ႈထိုင်ပၢင်ႇပွႆး ႁိမ်းၸမ်ၽြႃးလူင် ၵွျင်းတေႃႇၵၢင်ဝဵင်းၼမ်ႉၶမ်း တၢင်းၵႆမွၵ်ႈ 10-လၵ်း၊ ပေႃးယဝ်ႉ ၸုမ်းပွင်ၵၢၼ် 7-ၵေႃႉ တေသိုပ်ႇၵႂႃႇ တီႈလုမ်းၵွၼ်းၸႄႈဝဵင်းသေ တေယိုၼ်ႈဢၢပ်ႈၽိုၼ်လိၵ်ႈ ၶေႃႈတုၵ်းယွၼ်းၼင်ႇယိူင်းဢၢၼ်းဝႆႉ ဝႃႈၼႆ။

ပေႃးၽၢႆႇလုမ်းၵွၼ်းၸႄႈဝဵင်းၶဝ် တူၵ်းလူင်းၽွမ်ႉၸႂ်ၸွမ်း ၼႂ်းၶေႃႈတုၵ်းယွၼ်းၼၼ်ႉယဝ်ႉသေ ၽူႈပၢႆးပၢင်ၶဝ် တေသိုပ်ႇပိုၼ်ၽၢဝ်ႇဢွၵ်ႇ လွင်ႈလုမ်းၵွၼ်းၸႄႈဝဵင်းၶဝ် ႁၼ်လီၵမ်ႉထႅမ်ၸွမ်း ၼႂ်းၶေႃႈတုၵ်းယွၼ်းၼၼ်ႉယဝ်ႉၼႆသေ ၵၢၼ်ပႆတၢင်းလုၵ်ႉႁိုၼ်ႇၼႄၵၢင်ၸႂ် ယဝ်ႉတူဝ်လီငၢမ်းၼႆ ၵူၼ်းၼုမ်ႇဝဵင်းၼမ်ႉၶမ်း ၵေႃႉၼိုင်ႈ လၢတ်ႈၼႄပိူင်ၵျၢမ်း လၢႆးၵၢၼ်လုၵ်ႉႁိုၼ်ႇ ၵႂႃႇ တီႈတႆးလွတ်ႈလႅဝ်းၼင်ႇၼႆ။

ႁွင်ႈလူင် ၼမ်ႉသီးရီးၼႆႉ ပဵၼ်တီႈၸဝ်ႈသူၼ်ၸဝ်ႈၼႃး ဝၢၼ်ႈၶမ်း၊ ဝၢၼ်ႈၼွင်၊ ၸႄႈႁႆး ၸႃႉၵႂႃႇဝၢၼ်ႈႁိမ်းႁွမ်းၸိူဝ်းၼႆႉ လႆႈပိုင်ႈဢိင် ၸႂ်ယႂ်ႇ၊ ပဵၼ်ႁူဝ်ၼမ်ႉၼႃး ၸႂ်ႉလႆႈတႃႇ (3)ပၢၵ်ႇဢေႇၵႁိမ်းႁွမ်း၊ ဢၼ်ၶူင်းၵၢၼ် ငူၺ်ႇၵပႃႇၵျေႃႇၶဝ် ၵႂႃႇၶုတ်းသၢႆးႁိၼ်ႁႄႈၼၼ်ႉ မီးၽၢႆႇၼိူဝ်လွၵ်းၼႃး (3)လၵ်းပၢႆ ဝႃႈၼႆ။

ယွၼ်ႉပိူဝ်ႈ ပီႈၼွင်ႉၸဝ်ႈႁႆႈၸဝ်ႈၼႃး ဝဵင်းၼမ်ႉၶမ်း တေပႆတၢင်းလုၵ်ႉႁိုၼ်ႇၼႄၵၢင်ၸႂ်တေႃႇ ၶူင်းၵၢၼ်ငူၺ်ႇၵပႃႇၵျေႃႇၶဝ်ၼႆလႄႈ မိူဝ်ႈၼႆႉဝၼ်းထိ 04.September.2014 ယၢမ်းၵၢင်ၼႂ်ၸဝ်ႉမိူင်းပႆႇလႅင်းၼၼ်ႉ ယူႇတီႈၶူင်းၵၢၼ်ၶဝ် ၵၼ်ႉလႅတ်ႈၸၢင်ႈၵူၼ်းဝၢၼ်ႈ မွၵ်ႈ(20)ၵေႃႉ ၵႃးတၢင်ႇႁိၼ် (2-3)လမ်း တေႃႉႁိၼ် တေႃႉသၢႆးသေ ၵႂႃႇမႄးတၢင်း၊ လွမ်ႉႁူဝ်ႉၸွမ်းၽင်ႇၼမ်ႉ ၸိူဝ်းၼႆႉလႄႈ ထၢမ်ဢဝ်ငိုၼ်းၵႂႃႇသၢႆႈတႅၼ်းၶိုၼ်းသေ မႄးပၼ်ႁွင်ႈၼမ်ႉ၊ မႄးပၼ်သဵၼ်ႈတၢင်းၸိူဝ်းၼႆႉၼႆ ၸဝ်ႈၼႃးၼမ်ႉၶမ်းၵေႃႉၼိုင်ႈ သိုပ်ႇလၢတ်ႈတီႈ တႆးလွတ်ႈလႅဝ်းၼင်ႇၼႆ။

တႆးလွတ်ႈလႅဝ်း